Ba loron daruak husi estudu vizita ba Organizasaun Rejional Anti-Doping Sudeste Aziatiku (SEARADO) iha National Stadium- Sports Singapore iha loron-26 fulan-marsu tinan 2024, ekipa Anti-Doping hosi Komisaun Nasional Desportu (KND) – MJDAC hetan oportunidade partisipa iha aprezentasaun informativu lubuk ida. Sra. Eliza Tan husi Coach-SG fahe informasaun kona-ba programa dezenvolvimentu no kapasitasaun ba treinador sira iha Singapura, enkuantu Sr. Jemuel Fu aprezenta Enkuadramentu Desportu ba Labarik no Juventude, ne’ebé foka liu ba hasa’e esperiénsia no kualidade moris liu husi desportu.
Aleinde ne’e, ekipa mós simu informasaun husi Sr. Gobinathan Nair, Diretor-Jeral SEARADO, kona-ba Risk Assessment(RA) no Test Distribution Plan (TDP), Teste Anti-Doping reve Code Compliance Questionnaire (CCQ), no follow-up action ba servisu anti-doping ne’ebé la’o hela. Troka koñesimentu ne’e subliña dedikasaun atu promove dezenvolvimentu desportu no mantein jogu justu no mo’os iha rejiaun Sudeste Aziatiku.